回到那些年我們所熟悉的港產喜劇

過去90年代，過年睇賀歲片係一種習慣，可能係成龍嘅動作片，可能係家有囍事呢類劇中一家人搞到你唔笑都唔得嘅喜劇。當時入戲院只有一種期待，好笑又要大團圓結局，開開心心行出戲院過年團圓。而睇賀歲喜劇亦無話要有幾複雜幾有深度嘅劇情，最緊要開心，要warm，因為周街都過年歌又難得放假嘅時候，唔通要塞自己個腦好有深度又要諗爆頭嘅劇情?咁最好睇完之後出黎會講番幾句頭先邊幕勁好笑，咁就好滿足。但時代發展得越快，人嘅需求亦越高，電影亦必須越黎越重口味，當然係科技發展上這是時代進步嘅必然趨勢，不過亦因此簡而有力且能閤家觀賞嘅電影亦變得少見。能與家人一齊睇戲嘅年代似乎離我們遠了些，可能陪你睇戲嘅係同學，係情人，係朋友，但成家人呢，大家都好忙，你喜歡嘅劇情唔係賣飛佛，你睇你嘅我睇我嘅，賀歲電影似乎就咁少咗點family味。《一家大晒》呢部戲，讓人情不至禁地想起那些年如富貴逼人此類賀歲片，電影1個半鐘裏一家人所發生嘅故事，好自然地牽動著每位觀眾跟住難過跟住笑，更自然而然地帶動自己諗起與家人間嘅喜怒哀樂。今次係《一家大晒》呢部賀歲電影裏，可以睇到劇中一家人如何去共同渡過一些每個家庭都難以避免嘅情意結，睇佢哋如何一齊去創造回憶與笑聲，簡潔地讓我們重拾家庭疏離嘅感情。有時候，回到最簡單嘅初衷，正是我們呢個如此複雜嘅世代最需要嘅核心價值。至少當你攞起手機嘅時候，你會再次想起有時放下最尖端嘅科技連結卻反而換來最初人與人之間嘅情感相連。本文版权归作者maschrist所有，任何形式转载请联系作者。